Con este titorial faremos unhas prácticas sinxelas sobre como funcionan os operadores booleanos, e para isto realizaremos algunhas buscas no catálogo da Biblioteca.
Se precisas ampliar unha imaxe para vela mellor preme nela.
Á dereita tes a páxina de busca asistida por palabra clave do catálogo da Biblioteca.
Para avanzar neste titorial utiliza as frechas inferiores.
Comezamos!
Os operadores booleanos son moi importantes e menos complexos do que parecen. Uns termos de busca ben seleccionados e unidos cos operadores axeitados proporcionarán uns resultados moito máis adecuados.
Antes de nada, nesta imaxe tes un resumo dos operadores booleanos.
Os operadores booleanos poden formularse con AND/OR/NOT (na lingua correspondente ao recurso, por ex.: E/Y, OU/O, NON/NO...) ou con expresións verbais, como sucede se empregas a opción de busca avanzada de Google ou Google Académico.
Imos poñelos en práctica no catálogo da Biblioteca.
Escribe na opción de "Calquer campo" o termo autismo, tal e como se amosa nesta imaxe, e executa a busca.
Agora contesta:
Cantos resultados obtés?
A continuación regresa á pantalla de busca asistida por palabra clave e busca os termos autismo e alumnado, seleccionando o operador correspondente.
Cantos resultados obtés agora?
Poucos verdade? O operador AND/E/Y emprégase para buscar conceptos diferentes. O equivalente verbal sería “todas estas palabras”, e polo tanto reduce o número de resultados.
Deseguido busca autismo ou TEA, pois válenos calquera dos dous termos.
Como podes comprobar, o operador OR/OU/O aumenta o número de resultados e emprégase para combinar sinónimos e termos relacionados. O equivalente verbal sería “calquera destas palabras”.
Para rematar cos operadores imos empregar o NOT, que serve para excluír aspectos que non nos interesan. Entón, busca autismo e non asperger.
Cantos resultados obtés excluíndo o termo asperger?
O operador NOT/NON/NO úsase para reducir o número de resultados cando obtemos demasiados e non son todos relevantes, pero hai que usalo con coidado pois podemos perder información.
Existen moitas posibilidades de selección e combinación dos termos. No proceso de busca deberás probar diferentes opcións, cambiando os operadores e termos ata obter a información que consideres máis axeitada. Non existe unha metodoloxía de busca ideal, poden existir distintas posibilidades ou alternativas.
É cuestión de probar e probar...